Matthew 22

Mua emeria aawep enow maneka oniya nain arekin opora-ke

(Luk 14.16-24)

1Aria Yeesus kiiriw nainiw arekin opora oko feenap wia iromami maek, 2“Mua Maneka pika kemena-pa ikowa nain sira feenap ikua. Owow saria maneka-ko ona muuka emeria aaweya enow maneka onak. 3Onap weesereya ona uuwow mua wia sesekeya ikiwep womar unowa iiriw opor amisa wiep-puak nain wia maakemik, maa enowa nain ekapuk naek. Ikiwep wia maakemik-na wi miatinep me wiokamik. 4Ne kiiriw uuwow mua papako wia sesekami wia maakek, ‘Ni ikiwep opora iiriw amisa wiep-puam nain wia maakeka, “Yo maa enowa iiriw opep ikua. Ne maa eneka eliwa ifakimep uupep-puam. Maa muutitik iiriw onomakem. Ni aakisa ekapeka!” Ikip naap wia maakeka.’ 5Ne wi ikiwep wia maakemik-na opora me wiar miimamik. Wi wiena kookalowa-pa uuwowa oko ikiwomakemik, oko ona manina ikiwok, oko ona uuwowa oko ikiwok, 6ne wi papako-ke iikirami wi uuwow mua nain wia opap emina wia ururowami wia ifakimemik. 7Naap oniwkin owow saria nain-ke kema samor akena bagiwirap ona ami mua wia sesekeya ikiwep mua teeria nain wia ifakimemi koora wiar kukumakemik. 8Naap onap-puami ona uuwow mua papako wia farep wia maakek, ‘Yo maa enowa iiriw opep ikua, wi mua wia maakem nain wi maa me efar enimuk, wi neek ikauk. 9Naapeya ni aakisa ikiwep era maneka opopora-pa neeke iimarep ikok wi mua momor wia urufap wia maakiwkin iiwawun ekapuk.’ 10Naap wia maakeya ikiwep era opopor unowa naap iimarep mua wia urufap wia maakiwkin ekapomakemik. Mua eliwa ne mua samora pun iiwawun momor wia aawiwkin ekapemik. Ekapep koora maneka nain iiwawun takunemik.

11Aria owow saria nain wi mua wia urufinen naep koor kemena ikiwok-na mua oko urufak. O mia suuwowa eliw marew, muewow maa enowa bala me wuak. Naap urufap maakek, 12‘Emar, no muewow maa enowa yiar ekapon nain mia suuwowa me niemik nain no kamenap ekapon?’ Naap maakeya mua nain opora marewarek. 13Naemi owow saria nain-ke wia maakek, ‘Mua fain wapena kepura wiar kaikap amaporop owaruma-pa wafuriwkin epa kokoma-pa ikainok. Epa eena ikaimik nain wi omemi enek muuna geegenem-ikowa-ke.’” 14Yeesus opora nain wia iromap-puap kiiriw wia maakek, “Mua Maneka mua unowa wia fariya, nain papako muutiw wiar ekiwkin wia aawinon.”

Yeesus Siisar takis iwowa sira nain nokaremik

(Mak 12.13-17, Luk 20.20-26)

15Aria wi Farisi-ke wiam fiirimep opora anumap feenap maemik, “Yeesus akimamkun opora-ko samoreya-na opap ifakimiyen.” 16Opora nain aakunep-puap wiena teeria papako wia sesekiwkin wi Erot teeria mua papako wia aawep wiam ane-wafurap Yeesus wiar ikiwemik. Ikiwep maakemik, “Somek mua, i sira nefar amisaremik, no opora makena main. No Mua Maneka opora ifana wiarin nain era makena ookin. I mua yia mekawap me aakunin, weetak, opora me kiri-kiripin. 17Aria no aakisa opora fain-ko yia maake, no kamenap main, Rom saria maneka Siisar takis wuowa yia maakek nain, wuiyen-na Moses sira wuomakek nain puukiyen-i e weetak?” 18Wi wadol sira iiriw wiar amisarek. Naapeya wia maakek, “Ni mua opaimik kiri-kirowa-ke! Ni moram yo opora-pa korininok naep naap efa nokareman? 19Aria ni takis wuiman maamuma nain yiiwkin niar urufinen.” 20Ne iwiwkin opap ikok wia nokarek, “Aria maamuma fain mua naarew kukusa ne unuma-ke wiar ikua?” 21Ne maakemik, “Siisar kukusa-ke.” Naeya wia maakek, “Naapeya-na Siisar maamuma ona iweka ne maa mauwa Mua Maneka wiarik, nain ona kakeniw iweka.” 22Opora naap maeya miimap soranep opaimika tenemik. Ne ikiwemik.

Mua umep ikok iikirikuan

(Mak 12.18-27, Luk 20.27-40)

23Aria fofa kuisow nainiw wi Sadusi-ke Yeesus wiar ekapemik. Wi feenap maimik, mua umimik nain kiiriw me iikirikuan. 24Ne o nokaremik, “Somek mua, sira iiriw Moses wuak nain feenap, ‘Mua oko emeria aawep muuka marew ikok umeya-na ona wiamun-ke apura nain eliw wiar aawep weepe muuka imenominok.’ 25Aria kaka kuisow wi mua ikur okaiwi-pa erup ikemik. Ne iperowa-ke kiikir emeria aawep muuka wiipa me imenowa ikok umok. 26Umeya o ookap onarowa-ke apura nain aawok. Ne os pun muuka marew ikok umok. Ne kiiriw oko-ke apura nain aawok nain pun naap ikok umok. Ne teeria nainiw akena emeria kuisow nain aawep umomakemik. 27Naap ikok apura nain pun umok. 28Teeria kuisow nainiw emeria kuisow. Aria nain wiimar iikirow epa-pa mua naarew emeria wiar ikainon?” 29Naeya wia maakek, “Ni maa amisarowa saarik efa nokariman. Moram ni Mua Maneka opora nain urufap kemena baliwep me amisareman, ne ona kekanowa pun me wiar amisareman. 30Wiimar nainiw iikirow epa-pa emeria mua wi ensel saarik ikaikuan. Wi muewowa marew. 31Aria wi umep iikirowa nain Mua Maneka opora siisimep-puamik nain-ko me urufaman-i? Mua Maneka feenap maek,

32‘Abraham, Aisak ne Yekop wi wiam arow, nain yo wiena Mua Maneka-ke.’
(Eksodas 3.6)

Makena, wi umemik nain Mua Maneka wia urufam-ikaiya. Naapeya wi wiimar iikirowa wiar ikainon.” 33Naap maeya wi yakeyak maneka kakaemi opaimika tenemik.

Sira maneka

(Mak 12.28-31, Luk 10.25-28)

34Aria Yeesus wi Sadusi opora wia nomakeya wi Farisi-ke miimap wiam fiirimep opora aakunemik. Aakunep sira amis mua oko sesekamik. O ikiwep Yeesus opora-pa akimekam naep nokarek, 36“Somek mua, Moses sira wuomakek nain sira kain manek akena?” 37Naeya maakek, “Sira fain, ‘No Mua Maneka kookale, mia, kema, woosa iiwawun manekiw kookale.’ 38Sira nain-ke manek akena-ke. 39Ne oko feenap, ‘Mua oko wia kookale, nena name kookalin naap.’ 40Sira erup nain Moses sira wuomakek nain mikap maek, wi iiriw profet opora maem-ikemik nain pun sira erup nain akena mikami maemik.” Naap wia maakek.

Krais Dewit nembesir-ke ne pun ona Maneka-ke

(Mak 12.35-37, Luk 20.41-44)

41Aria wi Farisi papako ekapemi Yeesus wameiya-pa fiirimiwkin wia nokarek, 42“Ni Krais kamenap maiman? O naarew nembesir-ke?” Ne maakemik, “Dewit nembesir-ke.” 43“Naeya kiiriw wia maakek, “Makena maeman. Nain Ewar Eliwa-ke Dewit kema iweya Krais maemi maek,

‘Mua Maneka-ke yena Maneka efar maakek, “No yena aken ekeria-pa efar pokap ikaeya no iiwua iiwawun no kepur tepak-pa wia wuinen.” ’
(Someka 110.1)

45Dewit ona nembesir nain ‘Yena Maneka-ke’ naek. Ona nembesir nain kamenap ona Maneka wiar ikainon?”

46Naap maeya wi opora kuisow-ko me kiripomamik, iiwawun bauserap ikomakemik. Ne iir nain opora nokarowa me pepekeya nokarowa iiwawun piipuamik.